terça-feira, 3 de dezembro de 2013

El retrato y la muerte

Cruz Lichet, Virginia de la : El retrato y la muerte: la tradición de la fotografía postmortem en España. Madrid: Temporae, cop. 2013

Este libro é un estudo sobre a práctica da fotografía post-mortem e de defuntos que antano foi algo moi habitual e que na actualidade permanece oculta, é o resultado dunha tese doutoral, defendida en España, e dos primeiros estudos científicos e académicos que se realizaron sobre este tema. Editado por Temporae coa axudado Ministerio de Educación, Cultura e Deporte, contén un total de 185 ilustracións, das cales 175 son fotografías e 10 documentos orixinais da época.



Foto da autora: Virgina de la Cruz Lichet
Virginia de La Cruz Lichet é Doutora en Historia da Arte pola Universidade Complutense de Madrid. Na actualidade, é profesora de Arte Contemporánea e Historia e Teoría da Fotografía (entre outras) na Universidade Francisco de Vitoria (Madrid). A súa tese doutoral centrouse no estudo da fotografía post-mortem. É experta na historia dos primeiros procedementos fotográficos e, na actualidade, as súas investigacións baséanse no estudo do uso da imaxe na Arte Contemporánea.

Dentro do seu labor investigador, realizou unha investigación no Image Department del Victoria & Albert Museum durante a súa bolsa FPI do Ministerio de Cultura e Fondo Social Europeo, entre outros moitos proxectos de investigación.





Que sentido ten fotografar o corpo sen vida dun ser querido?
 

Esta é a pregunta que nos facemos cando abrimos as páxinas desta publicación e contemplamos as fotografías post-­mortem que nos mostran. Máis alá da sorpresa inicial que poidan provocar en nós, temos que ter en conta que cada imaxe, cada rostro representado e cada corpo inerte, relátanos historias pasadas, e cheas de vida da España de case un século, dende as últimas décadas do S. XIX, ata ben entrada a segunda metade do S. XX.

"El retrato y la muerte" é o primeiro estudo documental basado na disertación da fotografía post­mortem en España a través do cal nos achegamos á sociedade da época, ao seu xeito de sentir, de vivir e porque non, tamén de morrer. A tristura, o intento de captar unha imaxe para a posteridade, o medo ao esquecemento e ata unha proba gráfica da morte por motivos económicos ou de herdanzas, entre outras cousas, desenvolveron o costume de fotografar defuntos, logrando elevar esta práctica a toda unha arte. Coñecidos fotógrafos do momento, pasaron de captar sinxelas imaxes a recrear os máis elaborados escenarios e complexos fondos que trasladaban ao retratado ao outro mundo.


A práctica da fotografía post-­mortem, antano moi habitual, foi, contrariamente ao que poderiamos pensar na actualidade, frecuente tanto entre segmentos de poboación con ou sen recursos. As familias menos favorecidas economicamente, podían chegar ata a empeñar a casa para pagar o funeral, incluída a foto, xa que era o único xeito de poder recordar, in extremis, aqueles que se foron. Normalmente era a única imaxe que se tiña da persoa ou persoas, no caso concreto de fotografías en grupo xunto ao defunto. Na actualidade, este tipo de material fotográfico permanece oculto en case o 75-80% da súa totalidade (cifra difícil de concretar con certeza polo veo de ocultismo que rodea a esta temática). A maioría dos fotógrafos proviñan de ambientes rurais ou cidades moi pequenas e eran practicamente autodidactas e con escasos medios e material técnico, quitando algún caso concreto como Pintos, Rapaza, Reboredo.


 Por azar ou por providencia, a emoción encapsulada destas imaxes chegou as nosas mans, sentémonos pois a escoitar en silencio que nos queren contar....

                                                                                 Virginia de la Cruz Lichet 



Moitas grazas a Virginia por facilitarnos toda a documentación para poder elaborar este artigo
                                                                                                                                   
Bibliografía da autora:

segunda-feira, 4 de novembro de 2013

Cinema fóra das salas. E logo onde?


Hai pouco liamos en El Confidencial este artigo: “Los cines españoles han muerto, larga vida a los museos”, non nos gusta que desaparezan salas de cinema, mais encántanos que un medio de comunicación valore o labor que están facendo os museos a hora de conservar e difundir o cinema, ben a través de exposicións ou ben proxectando cinema con ciclos variados, desde os museos de arte contemporáneo aos museos etnográficos.
cartaz do ciclo Cine de outono 2013 Museo Etnolóxico. Ribadavia
 En Galicia o Museo do Pobo Galego: Mostra de cinema etnográfico, Museo de Lugo participa na Semana Internacional de Cine de Autor, os Museo Cientificos de A Coruña teñen programación continuada de cinema entre eles está o Museo Domus de A Coruña que ofrece cinema en 3D, o CGAC colabora co Festival Cineuropa , o MARCO de Vigo ten cursos e varios ciclos de cinema, o Festival AMAL de cinema árabe en edicións pasadas proxectou filmes en diferentes museos como a Rede Museistica Provincial de Lugo, no MACUF de A Coruña, e por suposto o Ciclo de Cine de outono:miradas etnográficas do Museo Etnolóxico. Ribadavia-Ourense que xa vai pola 2ª edición ademáis das colaboracións coa Federación de Cineclubes de Galicia e co Cineclube Padre Feijoo de Ourense no ciclo Marxes Fílmicas.
Tamén se pode ver cinema nas Bibliotecas Públicas, nas asociacións culturais, nas Casas da Cultura e Auditorios de moitos Concellos, nos Cineclubes de Galicia, a xente de A Coruña pode ir o CGAI a filmoteca de Galicia tamén ten un servizo de préstamo de producións audiovisuais das que a Xunta de Galicia ten dereitos de difusión para institucións e asociacións sen ánimo de lucro, nas Universidades con ciclos para case todos os gustos, un exemplo: no Campus de Ourense ciclo cinema: A muller na historia, ou o ciclo pensar o cine.
cartaz do CineClube Padre Feijoo de Ourense


E cando prefiras cinema na túa casa podes pasarte por calquera Biblioteca Pública de Galicia ben sexa Nodal, Municipal, Escolas de Idiomas ou Bibliotecas de Museos e pedir en préstamo o filme que máis che preste nese momento, nos últimos anos a sección de audiovisual foi medrando considerablemente, se o queres comprobar visita o taboleiro de pinterest de novidades de cinema da Biblioteca Pública de Ourense por poñer un exemplo.
Tamén a TV e a internet son canles para  ver cinema de balde nos casos de filmes que xa non teñen dereitos de autor ou pagando, referimos o caso de Play-Doc TV onde se poden ver a través de R Televisión os documentais proxectados no Festival Internacional de Documentais de Tui. Na internet hai en multitude de páxinas. 
Presentámosvos unha pequena lista de páxinas onde se pode acceder a filmes, documentais, curtametraxes, cinema experimental de dirección ou produción galega ou ben audiovisual sobre Galiza:
é unha plataforma web da Axencia Galega dasIndustrias Culturais (Agadic) da Consellería de Cultura, Educación e Ordenación Universitaria destinada á promoción e difusión da creación audiovisual galega cun obxectivo eminentemente cultural e divulgativo. A través deste portal, ofrécese aos internautas a posibilidade de acceder de xeito gratuíto a un amplo catálogo de filmes para o seu visionado completo.
Este servizo inicia a súa andaina en 2012 incorporando tanto novos contidos como parte dos que albergaba o antigo portal Flocos.tv. Os vídeos clasifícanse en torno a seis categorías principais: ficción, animación, documental, experimental, videoclips e adiantos.
documental galego máis antigo pódese ver en CanleTV

 -O soportal do audiovisual galego
promovido polo portal culturagalega.org, do Consello daCultura Galega. Permite ver trailers, así se fixo, documentos, curtas, mediametraxes, longametraxes, documentais, programas de TV, series… ademáis de recoller fichas de directoras/es, actrices, actores, guionistas, músicos
-Archivo Histórico del NO-DO noticiarios e documentais cinematográficos
Colabora RTVE e a Filmoteca Española para lanzar na internet o maior fondo histórico audiovisual de España: filmes como “Un perro andaluz” de Luis Buñuel, curtametraxes e documentais, así como os noticiarios do NO-DO desde 1943 a 1981 para consulta libre de toda a xente. Para localizar audiovisuais sobre Galiza pódense facer distintos tipos de búsquedas.
O proxecto Ruralmedia nace do intercambio de experiencias entre unidades (Cinemateca e Mediateca) dos Ministerios de Agricultura de Francia, Países Baixos e España, o obxectivo principal é difundir e transferir as experiencias e materiais do traballo compartido na recuperación e valorización do material multimedia que trata sobre o medio rural nos diferentes países. Pódense ver dous documentais sobre o traballo do agro en Galicia.
A través de redes sociais especializadas en videos como Vimeo ou Youtube podemos ver de balde varios filmes, curtametraxes, documentais galegos ou sobre Galiza, imos presentarvos unha pequena selección, pero podedes esculcar na rede seguro que atopades algo interesante.
En Vimeo podemos ver: 
-Percebeiros de David Beriain
-A conserveira de David Batlle   
-Lobos sucios  de Felipe Rodríguez Lameiro
-Galicia 1936-2011. Estudos sobre o filme de Carlos Velo.Estudo 3 de Pablo Cayuela e Ramiro Ledo.
En Youtube seleccionamos:
-El Peregrino 1963 documental de TVE  
-Un viaje por Galicia (1929) 
 Noutras canles:
-As silenciadas de Pablo Ces Marco

Na Biblioteca do Museo Etnolóxico temos entre outros estes títulos que vos suxerimos nunha entrada do blogue da Biblioteca: Cinema documental

Todos os 27 de outubro celébrase o Día Mundial do PatrimonioAudiovisual, da importancia de conservar este patrimonio e tamén na internet saben moito en Internet Archive: sitio web e organización sin ánimo de lucro destinada a conservar páxinas web e recursos multimedia de todo o mundo que pasaron ao dominio público, porque xa transcorreu o período de vixencia dos dereitos tras a morte do autor, ou que teñen unha licenza flexible que permite a súa distribución sen ánimo de lucro, como é o caso das Creative Commons. Buscando por Ourense pódense ver por exemplo vídeos das Asambleas que sefixeron en 2011 polo movemento 15M 
exemplo da situación das salas de cinema en Ourense

quarta-feira, 17 de julho de 2013

Exposición: "Vidal Bolaño e a Mostra de Teatro de Ribadavia"

A exposición: "Vidal Bolaño e a Mostra de Teatro de Ribadavia" é un traballo realizado polas profesoras do Departamento de Lingua Galega e Literatura do IES de Ribadavia: Rita Abraldes Iglesias e Maribel Gil Cacheiro, e que formou parte este curso 2012-2013 da programación didáctica do centro escolar para conmemorar a festividade das Letras Galegas de 2013 adicada ao autor, director e actor de teatro galego Roberto Vidal Bolaño.



Rita e Maribel nos meses previos á inauguración, en maio, da exposición no IES de Ribadavia, estiveron traballando coa documentación do Fondo documental da Asociación Cultural Abrente de Ribadavia (podedes consultar o inventario topográfico AQUÍ ), que está depositado no Museo Etnolóxico, a estreita relación que tivemos desde a Biblioteca do Museo Etnolóxico con elas e o excelente resultado da mostra, fixo que lle solicitaramos
nola deixaran exhibir nas salas do Museo durante os meses de verán, cando o instituto está pechado, e así poidesen aprender e gozar con ela todas as persoas que queiran. Por suposto a súa aceptación foi inmediata e con grande satisfación feito que agradecemos inmensamente, pois permite visibilizar o rico fondo documental da Asociación Cultural Abrente.





 A exposición está formada por un retrato collage de Roberto Vidal Bolaño elaborado con recortes de prensa, folletos relacionados con Vidal Bolaño e a súa obra, das alumnas e alumnos de 1º de BAC do IES de Ribadavia, e por tres paneis onde se expón a relación de Roberto Vidal Bolaño coa Asociación Cultural Abrente e as Mostras de Teatro Galego que organizaron  de 1973 a 1980 e que foron o xermolo do teatro galego. Estas Mostras de Teatro foron continudas pola Mostra Internacional de Teatro MIT que se continúa a celebra todos os anos en Ribadavia a finais de xullo, así como o Premio Abrente de textos teatrais.

 
O primeiro panel co título: "Os incios. Agrupación Cultural Abrente" segundo os seus estatutos nace para a promoción de actividades culturais primordialmente entre a mocidade e sen ánimo de lucro. Este panel presenta a través de artigos de xornais, documentación administrativa, folletos, fotos o nacemento en 1969 como Club Parroquial, pasando polos xantares enxebres, o cineclube, palestras ao redor da cultura e a política galega, e por suposto as mostras e os concursos de teatro, até que en 1983 se firma a disolución da Asociación. As persoas que formaron parte da Asociación Cultural Abrente ademais do traballo cultural fundamental conseguiron coa súa meticulosidade conservar toda a documentación administrativa e de función, o que permite facer un estudo rigoroso de toda a súa actividade.


O segundo panel co título: "Reinventando o teatro. Mostra e concurso de textos teatrais en galego de Ribadavia", adicada en especial as Mostras de Teatro, que este ano fan 40 anos, desde que en 1973 tivera lugar a primeira. Nas oito edicións destas mostras representáronse máis de 120 obras de teatro, participaron 180 grupos de teatro e presentáronse a concurso máis de 80 textos orixinais de teatro escrito en galego. Destacar o compromiso desde os inicios de Abrente coa lingua galega como instrumento de comunicación cultural, unha mostra é o limiar do folleto da V Mostra de Teatro Galego en 1977, podedes lelo e descargalo AQUÍ onde fan unha reivindicación do teatro en galego: "E proclamamos: o teatro, hoxe en Galicia, ten que ser unha arma ó servicio da normalización da língua e da liberación nacional. E o día de mañán xa veremos".

O terceiro panel co título: "Roberto Vidal Bolaño" céntrase na figura do homenaxeado no Día das Letras Galegas de 2013 e a súa participación tanto nos conscuros de textos teatrais onde gañou en 1976 con "Laudamuco señor de ningures" e en 1980 con "Sete Baileretadas de amor e unha de morte" que ese mesmo ano se representou na VIII Mostra polo grupo de teatro Estribel de Roberto Vidal Bolaño co título: " Bailadela da morte ditosa". Dentro de Fondo documental de Abrente están os orixinais e as plicas de todos os textos de teatro galego presentados ao longo de oito anos a estes concursos así como por suposto todos os textos gañadores, algúns deles hoxe en día recoñecidos autores de teatro galego, que daquelas non eran tanto.

Para saber todo sobre as Mostras de Teatro e os concursos de Abrente é imprescindible o traballo de investigación feito por Inma López Silva e Dolores Vilavedra no libro: Un abrente teatral:  as Mostras e o Concurso de Teatro de Ribadavia, editado por Galaxia en 2002 partindo do fondo documental de Abrente depositado no Museo Etnolóxico. 

Podedes descargar os paneis da exposición neste enlace AQUÍ.

Desde este espazo aberto agradecer o traballo de Rita e Maribel, así como a súa colaboración co Museo Etnolóxico, achegandoo a unha institución tan importante coma é a escola: tanto a alumnas e alumnos coma a profesoras e profesores.

domingo, 21 de abril de 2013

bookcrossing 2013

bookcrossing 2013 Melgaço (Portugal)

bookcrossing 2013 Praza Maior Ribadavia (Ourense)


Por segundo ano consecutivo a Biblioteca do Museo Etnolóxico. Ribadavia-Ourense participa na actividade conxunta, este ano máis de 60 bibliotecas de museos de toda España, liberarando libros, a actividade será o martes 23 de abril para celebrar o Día Internacional do Libro.
A Biblioteca do Museo liberará 25 libros por distintos espazos públicos de toda Galiza, nesta páxina: estante bookcrosing museo etnolóxico pódense ver os títulos dos libros e os lugares onde serán liberados. Como no ano 2012 serán libros editados polo Museo, así como duplicados e doazóns.

O bookcrossing, apareceu en 2001 como un movemento internacional cunha filosofía basada na tres erres, do inglés: ler (read), registrar (register) e liberar (release), o bookcrossing permite non só compartir e intercambiar libros de balde, senón tamén seguir os pasos do libros, quen o leu e onde, calquera persoa pode participar nesta experiencia, non só recollendo os libros senón tamén poñendo en circulación outros da súa propiedade, rexistrando na páxina web do bookcrossing e liberándos despois nun lugar público.

Este ano 2013 queremos tentar implicar á xente para que participe activamente neste movemento, e imos empezar polo alunado de Turismo da Facultade de Empresarias e Turismo  do Universidade de Vigo no Campus de Ourense, grazas á colaboración da profesora Fátima Braña. O luns 22 de abril presentaremos e explicaremos en que consiste esta liberación de libros, cuxo obxectivo é que os libros circulen e despois pediremos que se encarguen de liberar algúns do libros que rexistramos na páxina de bookcrossing do Museo Etnolóxico, xa coas etiquetas, identificación, e colocados en bolsas de plástico (por se chove),

libros preparados para a liberación
para que os solten en calquera dos espazos públicos polos que pasen da súa cidade, vila, aldea .... así conseguiremos ampliar os lugares da liberación. Ademáis de facerlles ver o fácil que é participar nesta rede social, na que como outras o único que hai que facer é rexistrarse.
Cantos libros temos na casa que están desexando viaxar?

O éxito do bookcrossing do ano pasado fixo que consideraramos desde a Biblioteca do Museo rexistrarnos como zona oficial bookcrossing, así as salas de exposición do Museo son durante todo o ano, un lugar público de liberación de libros: onde nós imos soltando libros e a xente vén recollelos para gozar deles e despois pór de novo en circulación, mais tamén calquera pode traer alí os seus libros para liberalos, ben xa rexistrados ou senón nós rexistrámolos no perfil de bookcrossing do Museo.
Podedes escoitar a entrevista que nos fixeron na Radio Galega no programa Vivir aquí do día 22 de abril de 2013 AQUÍ (nos 5 últimos minutos do programa).

liberación 2012 en Carballiño

liberación 2012 nas Burgas de Ourense

Para ver máis fotos do bookcrossing de 2013 pica neste flickr AQUÍ
Para ver máis fotos do bookcrossing de 2012 pica neste flickr AQUÍ
                                                                     

segunda-feira, 15 de abril de 2013

Documentos de acceso libre: bibliotecas dixitais e repositorios

As bibliotecas, centros de documentación, arquivos e museos, como centros de conservación e difusión do patrimonio e do coñecemento, nos últimos anos veñen traballando en proxectos de dixitalización co obxectivo de conservar e preservar o patrimonio, mais tamén para difundilo e permitir que calquera poida acceder aos documentos con facilidade. Estes recursos dixitalizados pódense encontrar na internet nas bibliotecas dixitais, virtuais, nos repositorios, nas mediatecas.
Na literatura profesional existen moitas definicións de Biblioteca Dixital, imos dar aquí a de José Antonio Merlo Vega: "Colección de documentos electrónicos convenientemente organizada e disposta para o seu uso", o importante non é só que os documentos estén dixitalizados, senón que estén organizados para facilitar o seu acceso, por iso é unha Biblioteca dixital ou virtual mais Biblioteca.
Neste artigo faremos un resumo daquelas BIBLIOTECAS DIXITAIS onde podemos consultar e descargar documentos relativos a Galicia:

Documento de Galiciana
-Galiciana: Biblioteca Dixital de Galicia está xestionada desde a Biblioteca de Galicia, ademáis da dixitalización de fondos encárgase da normalización. En Galiciana pódense encontrar: mapas como un mapa de ferrocarriles de Galicia e Asturias do S. XIX, xornais e revistas antigas como: Vida Gallega  , manuscritos como os de Martin Sarmiento do S. XVII, libros e escritos de Rosalía de Castro, Concepción Arenal, Intégrase en proxectos máis amplos como Hispana, Biblioteca Dixital Española onde se poden consultar as coleccións dixitais de arquivos, bibliotecas e museos españoles e Europeana, Biblioteca Dixtial Europea.

Documento Real Academia Galeega
-Biblioteca e hemeroteca virtual da Real Academia Galega: pódense consultar obras como "Queixumes do pinos" de Eduardo Pondal, "Cantares gallegos" de Rosalía de Castro entre outros autores como Filomena Dato, Marcial Valladares, Antonio López Ferreiro ..., destacamos especialmente a hemeroteca virutal onde ademáis de revistas editadas en Galicia: El Centinela de Galicia , A Fuliada, Galicia industrial y comercial teñen especial importancia as editadas en America polas colectividades galegas.

Documento BNE
 -Biblioteca Digital Hispánica (BDH) da Biblioteca Nacional Española (BNE) con acceso libre e gratuito a miles de documentos dixitalizados: debuxos, fotografías, gravados, ephemera, partituras, libros, cartaces, recursos sonoros, e prensa e revistas na Hemeroteca Dixital da BNE, buscade por Galicia e xa veredes todo o que podedes encontrar.

-Biblioteca Virtual do Patrimonio Bibliográfico: proxecto de colaboración entre Estado e as Comunidades Autónomas, permite a consulta de libros antigos e manuscritos que forman parte do Patrimonio Histórico Español, que senon estiveran dixitalizados sería imposible a súa consulta.

-PARES. Portal de Arquivos Españois: permite o acceso a documentos dixitalizados polos Arquivos Españois, como documentos de distintos mosteiros galegos, do Consello da Inquisición, codices, cartularios.

-Biblioteca Virtual Miguel de Cervantes: plataforma dixital de acceso libre a textos, imaxes, vídeos, audios sobre as letras e a literatura hispanoamericana, onde hai un subportal sobre as Letras Galegas que facilita "aos usuarios da rede obras dixitalizadas da literatura galega de todos os tempos, dende as primeiras manifestacións medievais (séculos XIIIXV) até a actualidade". Destacamos revistas editadas en América por xente galegas emigradas, moitas edicións facsimilares do Centro Ramón Piñeiro como: A gaita gallega editada en Cuba, Alma Gallega en Montevideo, etc.

Biblioteca Virtual Miguel de Cervantes

-Colección Digital Complutense: artigos científicos, libros, gravados, teses de doutoramento lidas na Universidade Complutense poden consultarse e descargarse en acceso aberto.

Tamén queremos facer un pequena síntese de distintos REPOSITIORIOS universitarios e institucionais onde se almacenan e difunden en acceso aberto os traballos das persoas que investigan nesa universidade ou institución, é unha maneira de difundir o coñecemento científico a toda a poboación:

-Digital CSIC. Repositorio institucional do CSIC relativo a Galicia destacamos os documentos do Instituto de Estudios Gallegos Padre Sarmiento.

-Repositorio Institucional da Universidade de Santiago de Compostela (USC)

-Repositorio da Universidade de A Coruña RUC neste repositorio podemos encontrar cartaces das Mostras de Teatro de Ribdavia, pertencentes a colección de Francisco Pillado Mayor.

Documento Repositorio Univerisdade A  Coruña
 -Recolecta. Recolector de Ciencia Abierta agrupa a todos os repositorios dixitais  científicos de acceso aberto de España, nos que están incluidos tamén as Universidades Galegas.

-DIALNET  é un portal de contidos bibliográficos no que colaboran 77 bibliotecas, de Galicia a Biblioteca da Universidade de A Courña, elaborando bibliografías e vaciando artigos de revistas, congresos, etc., ademáis de ser unha hemeroteca virtual na que se poden consultar a texto completo e descargar moitos artigos, teses de doutoramanento a texto completo incluidas as lidas nas Universidades de Santiago de Compostela e A Coruña.

Outras MEDIATECAS ou sitios onde se poden consultar e descargar documentos de balde sobre Galicia:

-Centro Ramón Piñeiro ten un catálogo moi interesante de monografías e revistas relacionadas coa cultura galega de acceso e descarga libre, destacamos as edicións facsimilares de revistas publicadas polas Asociacións de Emigrantes Galegos en América.

-Mediateca do Consello da Cultura Galega 
permite a consulta e descarga da publicacións editadas por esta institucións: catálogos de exposicións, congresos, monografías, informes sobre a cultura galega, etc., ademáis de vídeos sobre as conferencias e congresos organizados no Consello da Cultura.

-Galegobook a biblioteca en liña sobre a lingua: "é un espazo onde poder publicar e compartir libros electrónicos que circulan pola rede sobre o galego", este é un proxecto individual que agradece a colaboracíón de toda a xente para facer un difusión colectiva da língua galega.

-Arquivo de Alan Lomax este etnomusicólogo estadounidense nas súas viaxes polo mundo fixo unha das máis importantes recopilacións de cancións e música populares, que agora se poden escoitar na rede, tamén programas de radio, fotografías, vídeos das súas investigacións. É moi interesante a recopilación de música popular galega.

-Arquivo do Patrimonio Oral da Identidade (APOI) portal de dixitalización, catalogación, estudo e difusión do patrimonio inmaterial galego.

segunda-feira, 18 de fevereiro de 2013

Informe Biblioteca 2012


xornal antes da restauración
Conservación da colección:

xornal restaurado e encapsulado
Nos distintos fondos e depósitos documentais e bibliográficos existen documentos antigos en mal estado de conservación o que moitas veces dificulta o seu acceso, sobre todo xornais locais antigos. Realizada unha primeira análise polo Departamento de Restauración detectouse a necesidade de facer un proxecto de conservación, pois, sobre todo os máis antigos, estaban en perigo de perderse. En outubro de 2012 empezouse a traballar co xornal local máis antigo: El Avia (1887), despois de que cada número pase polo laboratorio de restauración, chega á biblioteca para a súa dixitalización, seguindo os criterios indicados desde a Biblioteca de Galicia, para posteriormente poder incluilos en Galiciana á Biblioteca Dixital de Galicia. Este proceso de dixitalización permite tanto a conservación como a facilidade no acceso ao documento e a súa difusión a través da internet, unha vez que se suban a Galiciana, neste enlace aquí pódese ver un dos números de El Avia xa dixitalizado en Galiciana.

Difusión selectiva da información:
-Das novidades, tanto das monografías como dos novos números das revistas, se informa puntualmente tanto a usuarios/as internos/as e externos/as a través de correo electrónico, e desde novembro de 2012 a través das redes sociais, para a difusión de novidades utlizamos Pinterest http://pinterest.com/museoetnoloxico/  : onde subimos a portada do documento e engadimos o enlace ao índice ou sumario da obra, sobre todo de publicacións periódicas, ao carecer prácticamente de novidades en canto a monografías, por falta de orzamento, que só se mantivo para continuar as suscrición de publicacións periódicas especializadas.

zona oficial bookcrossing nas salas de exposición
-Celebramos o Día Internacional do Libro (23 de abril) uníndonos á  inicitiva internacional de bookcrossing, liberación de libros, promovida pola Biblioteca-Centro de Documentación ARTIUMde Vitoria, na que participaron máis de 70 bibliotecas de museos. A Biblioteca do Museo Etnolóxico liberou libros que xa están viaxando. Como a iniciativa foi tan eficaz decidimos crear nas salas do Museo Etnolóxico unha zona oficial permanente de liberación de libros onde imos depositando libros libres tanto desde o Museo como calquera persoa pode liberar os seus libros nesta zona bookcrossing, o xogo é que os libros circulen polo tanto cazar un libro liberado supón volver a liberalo e non deixar que se aburra no estante da casa. Esta é a biblioteca liberada polo Museo Etnolóxico AQUÍ.

a Biblioteca "invadindo" a exposición "A mirada dos espazos"
-"A Biblioteca invade espazos expositivos": para difundir os fondos bibliográficos da Biblioteca surxiu a idea de incluir nas exposicións temporais organizadas polo Museo, material bibliográfico e documental, a idea é aportar documentación sobre os temas da exposición, acercar pequenas bibliotecas temáticas a usuari@s do Museo que en principio non utlizarían a biblioteca do museo, e talvez nen saiban que exista. O material bibliográfico non como peza exhibida senón como material para consultar sobre unha mesa para que a xente poida consultalo fácilmente. Esta experiencia levouse a cabo nas exposicións: “Lagares Rupestres. Pegadas dahistoria vitivinícola en Galicia” marzo 2012, “A MIRADA DOS ESPAZOS. Cara aunha antropoloxía visual” 5 setembro 2012, “Outono fotográfico” novembro 2012


-Continuamos difundindo a actividade e os fondos da biblioteca a través do blogue da biblioteca, cunha actualización periódica. En 2012 introducimos 11 entradas de temas variados: informe da biblioteca, documentos sobre o cinematógrafo, o barallete: fala secreta dos afiadores, máscaras do entroido ourensán, álbum de cromos:”Las Bellezas de Galicia”, sobre a actividade a biblioteca comparte espazos expositivos, sobre o bookcrossing, documentación e bibliografía do viño do Ribeiro, o Día Internacional do Museos, as revistas de moda antigas, relación de revistas especializadas do noso fondo bibliográfico que son difíciles de encontrar en outros centros, durante este ano 2012 o blogue da biblioteca tivo 1790 visitas.
Desde a Biblioteca do Museo tamén actualizamos as redes sociais nas que está presente o Museo: Facebook (a páxina de Facebook do Museo ten 336 siareiros/as (que aumentan cada día, grazas a todas as persoas que nos siguen) que acceden  e comparten diaramente  información e documentación aportada relacionada cos fondos e actividades do Museo, Twitter @museoetnoloxico (desde esta rede social  informamos e interactuamos con 909 tuits para 286 persoas, institucións e asociación que nos siguen), Slideshare, Youtube, Flickr, Issuu, Pinterest sempre co nome museoetnolóxico.

Usuarios/as:
-Atendeuse a solicitude de información do persoal do museo como apoio documental e bibliográfico ás actividades desenvolvidas nas distintas áreas do museo: catalogación, conservación e restauración de pezas, exposicións… ben aportando fondos da propia biblioteca e ou ben aproveitando o servizo de préstamo interbibliotecario con bibliotecas galegas e estatais.
-83  usuarios/as externos/as  foron atendiados/as ben por correo electrónico, teléfono, persoalmente ou a través de préstamo interbibliotecario, sen esquecer que todas son consultas especializadas e sempre personalizadas, tendo en conta que a consulta consiste en buscar e seleccionar a información, facilitar o acceso o documento ben de forma presencial ou ben a través de fotocopias e cada vez máis a través da dixitalización de documentos. Tamén se xestionaron préstamos intrabibliotecarios con outras Bibliotecas da Rede de Bibliotecas de Galicia.
-As consultas ao catálogo en liña da biblioteca do museo foron de 1531, baseadas nunha estimación das administradoras do catálogo colectivo da Rede de Bibliotecas de Galicia, no que está integrado o catálogo da Biblioteca do Museo Etnolóxico. Ribadavia-Ourense.


Outras actividades:
En novembro de 2012 o Ministerio de Cultura publicou en liña as actas da I Jornada de Bibliotecas de Museos: Nuevos medios y nuevos públicos (Madrid. 28, 29 e 30 de novembro de 2011) http://www.mcu.es/museos/docs/Primeras_Jornadas_BIMUS.pdf, nas que aparece o artigo: Bibliotecas de museos na “Rede de Bibliotecas de Galcia” escrito conxuntamente con Antonia Soto, bibliotecaria do Museo das Peregrinacións e de Santiago.

Xestión da colección bibliográfica:

Os datos do proceso de xestión da colección durante o ano 2012: compra, recepción, rexistro, catalogación e ubicación dos fondos na estantería foi o seguinte
-Monografías rexistradas durante 2012: 173 títulos, destacar que durante este ano debido a falta de orzamento non se comprou ningunha monografía, todas se adquiriron por doazón e por intercambio
-Catalogáronse no catálogo colectivo da Rede de Bibliotecasde Galicia, por parte da Biblioteca do Museo 435 exemplares, tendo en conta que tamén se fai catalogación retrospectiva de documentos xa existentes, e non só dos que ingresan.
-Publicacións periódicas activas durante 2012: 116 títulos (só dous máis que no ano 2011, que entraron por doazón), destes 116 títulos activos con varios números ao ano, que foron xestionados para facilitar o acceso ao documento.
-Baleirado de publicacións periódicas e obras colectivas: 200 exemplares
-Xestión de 30 intercambios de publicacións con diversas institucións, con recepción e envío de publicacións.